රාජ්‍ය පරිපාලන අමාත්‍යාංශයේ සහකාර අතිරේක ලේකම්වරියක් පොලිස් මධ්‍යම අපරාධ විමර්ශන කාර්යාංශය විසින් ඊයේ (19) අත්අඩංගුවට ගෙන තිබේ. ඒ අති සුඛෝපභෝගී වාහනයක් ලබා දෙන බව පවසා රුපියල් දෙකෝටි විසි හත් ලක්ෂයක මුදලක් වංචා කළ බව කියන සිද්ධියක් සම්බන්ධයෙනි. මෙලෙස අත්අඩංගුවට ගෙන ඇත්තේ දෙහිවල නැදිමාල පදිංචි 56 හැවිරිදි නිලධාරිනියක වන අතර කොළඹ ප්‍රදේශයේ වෛද්‍යවරයෙකු විසින් පසුගිය දෙසැම්බර් මස සිදුකර ඇති පැමිණිල්ලකට අදාළව සැකකාරිය අත්අඩංගුවට ගෙන ඇත. සැකකාරිය මීට මාස හතකට පෙර වරාය හා සිවිල් ගුවන් සේවා අධිකාරියේ සේවය කර ඇති අතර එම අවධියේදී පැමිණිලිකාර වෛද්‍යවරයාගෙන් මුදල් ලබා ගෙන ඇති අතර වරාය පරිශ්‍රයේ වෙන්දේසි සඳහා යොදා ගන්නා වාහන සහනදායි මිලට ලබා දීමට හැකි බව පවසා ඇතැයිද මූලික විමර්ශනවලදී අනාවරණය වී තිබේ. පසුව සැකකාරිය අදාළ වෛද්‍යවරයාට වාහනය හෝ මුදල් ලබා නොදී මගහැර ඇති බවත් ඒ අනුව වෛද්‍යවරයා විසින් සිද්ධිය පිළිබඳව පොලීසිය වෙත පැමිණිලි කර ඇති බවත් සඳහන් වේ. අත්අඩංගුවට ගත් සැකකාරිය අද (20) කොටුව මහේස්ත්‍රාත්වරයා හමුවට ඉදිරිපත් කිරීමටද නියමිතය. මධ්‍යම අපරාධ විමර්ශන කාර්යාංශයේ අධ්‍යක්ෂ ජ්‍යෙෂ්ඨ පොලිස් අධිකාරී කමල් ආරියවංශ මහතාගේ උපදෙස් මත මූල්‍ය හා වාණිජ අපරාධ විමර්ශන අංශයේ ස්ථානාධිපති පොලිස් පරීක්ෂක රාජිත වර්ණප්‍රියගේ මෙහෙයවීමෙන් උප පොලිස් පරීක්ෂක මෙන්ඩිස් යන නිලධාරීන් වැඩිදුර පරීක්ෂණ පවත්වති.