ශ්‍රී ලංකාව හා සංචාරක එංගලන්ත කණ්ඩායම අතර කොළඹ ආර්. ප්‍රේමදාස ක්‍රීඩාංගණයේ අද (24) පැවැත්වෙන දෙවන එක්දින ක්‍රිකට් තරගයේ කාසියේ දිනාගැනීමට ශ්‍රී ලංකාව සමත්විය. ඒ අනුව ඔවුන් පළමුව පන්දුවට පහරදීමට තීරණය කළේය. දෙරට අතර පළමු තරගයෙන් ලකුණු 19ක ජයක් ලැබූ ශ්‍රී ලංකාව මේ වනවිට තරග 3කින් යුත් තරගාවලියේ තරග 1-0ක් ලෙස පෙරමුණ ගෙන සිටියි. අද තරගයද ජයගැනීමට හැකිවුව හොත් තරගයක් ඉතිරිව තිබියදීම තරගාවලියේ ජය තහවුරු කරගැනීමට ශ්‍රී ලංකාවට හැකිවේ. මේ සමග වසර 12කට පසු එංගලන්තයට එරෙහිව එක්දින තරගාවලියක් ජයගැනීමට ද ශ්‍රී ලංකාවට හැකිවනු ඇත. ශ්‍රී ලංකාව අවසන්වරට එක්දින තරගාවලියකදී එංගලන්තය පරාජය කර ඇත්තේ 2014 වසරේදීය. එතැන් සිට මේ දක්වා පැවති එක්දින තරගාවලි ත්‍රිත්වයක් අඛණ්ඩව පරාජය වී තිබුණි.